Ҳамдиёрони азиз ва ҳамкорони гиромӣ!
Имрӯзҳо мардуми шарифи Тоҷикистон бо шукргузорӣ аз сулҳу суботи комил, пешрафту шукуфоии кишвари азизамон, ойини бостонии милливу мардумӣ ва соли нави аҷдодиамон – Наврӯзи оламафрӯзро бо хурсандиву хушҳолии зиёд таҷлил намуда истодаанд.
Бо истифода аз ин фурсат, кулли кормандони Хадамоти давлатии назорат ва танзим дар соҳаи нақлиёт ва дар симои Шумо мардуми шарифи Тоҷикистонро ба ифтихори фарорасии Наврӯзи фархундапай самимона шодбош мегӯем.
Наврӯз бо таърихи беш аз шашҳазорсолаи худ аз қабили бузургтарин ҷашни миллии тоҷикон ва соли нави аҷдодии мо маҳсуб ёфта, ниёгони некноми мо онро аз замонҳои хеле қадим таҷлил намуда, омадани баҳор ва эҳёи табиатро бо иштироки хурду бузурги диёр, бо чеҳраи шоду дили пур аз фараҳ истиқбол мегирифтанд.
Мардуми тоҷик Наврӯзро давоми ҳазорсолаҳо ҳамчун яке аз ойинҳои беҳтарини миллӣ аз насл ба насл ба мерос гузошта, анъанаҳоиҷашнии онро то замони мо бегазанд расонидаанд.
Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми табрикотӣ ба ифтихори Наврӯз ба сокинони шарифи Тоҷикистон таъкид намуданд, ки баъди соҳибистиқлол гардидани Тоҷикистони азизамон ин ҷашни бузурги аҷдодиамонро умри дубора бахшида, ба сатҳи байналмилалӣ расонидани мақоми онро таъмин кардем ва ин ойини деринаи ниёгонамонро ҳар сол дар саросари мамлакат бо иштироки тамоми сокинони кишвар таҷлил менамоем.
Ҷаҳонӣ шудани Наврӯз мо – ворисони ин ҷашни бостониро водор месозад, ки дар баробари ифтихор кардан аз ин ойини дерина, барои минбаъд эҳё намудану ривоҷ додани суннатҳои ахлоқиву маънавӣ ва фарҳангии он бештар кӯшиш намоем ва ҷиҳати ба аҳли башар боз ҳам беҳтар муаррифӣ намудани фазилатҳои инсонпарваронаи Наврӯз пайваста саъю талош варзем.
Маълум аст, ки ҷавҳари таърихиву фарҳангии ин ҷашн саодату пирӯзии аҳли башар буда, инсонҳоро ба ҳамдигарфаҳмиву ҳамзистии осоишта, накӯкориву созандагӣ, дӯст доштану эҳтиёт кардан ва парастиши табиату қадршиносии неъматҳои он ҳидоят менамояд.
Мақоми байналмилалиро касб кардани Наврӯз имкон фароҳам овард, ки мардуми олам аз фалсафаи эҳёгариву созандагӣ ва башардӯстонаи ин ҷашни бисёр қадима ҳарчи бештар огоҳ гарданд, зеро Наврӯз танҳо марбут ба қаламрави зуҳури он набуда, балки суннату анъанаҳои неки он метавонанд ҳамчун василаи ҳамзистии осоишта баҳри тамоми аҳли башар хизмат намоянд.
Боиси қайд аст, ки Наврӯз барои кормандони Хадамоти давлатии назорат ва танзим дар соҳаи нақлиёт ҷашни дӯстдоштанист.
Кормандони мо аз Наврӯз ҳамчун иди сари сол мутантан истиқбол карда, ҳамасола ин ҷашни аҷдодиамонро бо дастовардҳои арзандаву шоиста пешвоз мегиранд.
Бо умеди он, ки Наврӯзи имсола боиси фатҳу кушоишҳои нав, рушду пешравӣ барои ҳамватанони азизи мо хоҳад гардид, бори дигар Шуморо ба ифтихори таҷлили ҷашни Наврӯзи байналмилалӣ табрик гуфта, ба ҳар яки Шумо тандурустӣ, комёбиву нишот, бахту саодат ва файзу баракати наврӯзиро орзу менамоям.
Бигзор Наврӯзи имсола бо тамоми шукӯҳу шавкаташ ба мардуми азизамон баҳори нек, амалишавии ниятҳо, ба деҳқонон ҳосили фаровон, ба кормандон зиракиву бедории сиёсӣ ва муроди дилу комгорӣ эҳдо намояд.
Ҳар рӯзатон Наврӯз бод!
Наврӯзатон фирӯз бод!
Ҷашни Наврӯзи оламафрӯз муборак бошад!
Бо эҳтироми самимӣ,
Сардори Хадамоти давлатии назорат
ва танзим дар соҳаи нақлиёт
Қурбонзода Д.Қ.
