Санаи 22-юми июли соли 2025 дар назди Сардори Хадамот бо иштироки кормандони масъули воҳидҳои сохтории минтақаҳо дар бораи пурра пешгирӣ намудани ҳаракати воситаҳои нақлиёти гаронвазн дар роҳҳои автомобилгард ва ба танзим даровардани фаъолияти онҳо ҷаласаи корӣ баргузор гардид. Қайд карда шуд, ки дар давраи ҷорӣ намудани маҳдудиятҳои мавсимии сарборӣ ба тири меҳвари воситаи нақлиёт борҳо асосан шабона интиқол дода мешаванд.
Масъалагузорӣ карда шуд, ки бо риояи талаботи Кодекси меҳнат шабона кормандон назоратро пурзӯр намуда, мошинҳои гаронвазн ва ғайриқонуни фаъолияткунандае, ки аслан шабона борҳоро интиқол медиҳанд, пурра пешгирӣ ва чораандешӣ карда шаванд.
Зарур шуморида шуд, ки бо корхонаҳои истеҳсолкунанда дар бораи аз меъёр зиёд бор накардани молу маҳсулот ба воситаи нақлиёти автомобилӣ ва ҳамчунин бо пардаи ҳимоявӣ пӯшонидани борҳои пошхуранда корҳои фаҳмондадиҳӣ ба роҳ монда шавад.
Кормандон қатъӣ таъкид карда шуданд, ки дар ҳолати мусоидат кардан ба гузариши воситаҳои нақлиёти гаронвазн то аз вазифа озод намудан чораандешӣ карда мешаванд.
Бо дарназардошти масъалаҳои баррасишуда дар ҷаласа қарорҳои дахлдор қабул карда шуд.
